Chabrias Atheniensis periit bello sociali tali modo. Oppugnabant Athenienses Chium. Erat in classe Chabrias privatus, sed omnes qui in magistratu erant auctoritate anteibat, eumque magis milites quam qui praeerant aspiciebant. Quae res ei maturavit mortem. Nam, dum primus studet portum intrare gubernatoresque iubet eo dirigere navem, ipse sibi perniciei fuit; cum enim eius navis eo penetrasset, ceterae non sunt secutae. In portu, cum ille circumfusus hostium concursus strenue pugnaret, eius navis rostro percussa coepit sidere. Hinc refugere quamvis posset, si se in mare deiecisset, quia Atheniensium classes natantes excipiebat, vitam amittere maluit quam navem relinquere in qua vectus erat. Id ceteri facere noluerunt atque nando in tutum pervenerunt. At Chabrias, praestare honestam mortem existimans turpi vitae, comminus pugnans telis hostium interfectus est.
- Latino
- Maiorum Lingua B
- Versioni dai Libri di Esercizi
