Hamilcar non solum hostes a muris Carthaginis removit, sed etiam adeo eos compulit ut, locorum angustiis clausi, plures fame quam ferro interirent. Rebus his peractis, fidenti animo atque infesto Romanis, quo facilius causam bellandi reperiret, effecit ut imperator cum exercitu in Hispaniam mitteretur, eoque secum duxit filium Hannibalem annorum novem. Hamilcar, posteaquam mare transiit in Hispaniamque venit, magnas res secunda fortuna gessit: maximas bellicosissimasque gentes subegit, equis, armis, viris, pecunia totam locupletavit Africam. Hic, cum in Italiam bellum inferre meditaretur, nono anno postquam in Hispaniam venerat, in proelio pugnans adversus Vettones occisus est. Huius perpetuum odium erga Romanos maxime concitasse (= concitavisse) videtur secundum bellum Poenicum. Namque Hannibal, filius eius, assiduis patris obtestationibus eo est perductus, ut interire quam Romanos non experiri mallet.
- Latino
- Maiorum Lingua C
- Versioni dai Libri di Esercizi
