Quadrimus patrem amisit. Cum duodecimum annum ageret, aviam Iuliam, quae defuncta erat, pro contione laudavit. Quadriennio post virilem togam sumpsit et militaribus donis triumpho Caesaris Africano donatus est, cum expers belli propter aetatem esset. Cum profectus esset mox avunculus in Hispanias adversus Cn. Pompei liberos, vixdum firmus a gravi valitudine eum subsecutus est et per infestas hostibus vias cum paucissimis comitibus naufragium etiam fecit, sed magnopere demeruit et approbata est cito etiam morum indoles super itineris industriam. Cum Caesar post receptas Hispanias expeditionem in Dacos et inde in Parthos destinaret, praemissus est Apolloniam et ibi studiis vacavit. Utque primum occisum eum heredemque se esse comperit, diu cunctatus est, tandem urbem repetit et hereditatem adiit.2Atque ab eo tempore exercitus comparavit primum cum M. Antonio et M. Lepido deinde tantum cum Antonio per duodecim fere annos, novissime per quattuor et quadraginta solus rem publicam tenuit.
- Latino
- Lingua Magistra 1
- Versioni dai Libri di Esercizi
