Iugurtha ubi eos Africa decessisse ratus est neque propter loci naturam Cirtam armis expugnare potest vallo atque fossa moenia
circumdat turris extruit easque praesidiis firmat; praeterea dies noctisque aut per vim aut dolis temptare; defensoribus
moenium praemia modo modo formidinem ostentare; suos hortando ad virtutem arrigere; prorsus intentus cuncta parare. Adherbal
ubi intellegit omnis suas fortunas in extremo sitas hostem infestum auxili spem nullam penuria rerum necessariarum bellum trahi
non posse ex iis qui una Cirtam profugerant duos maxime impigros delegit; eos multa pollicendo ac miserando casum suum
confirmat uti per hostium munitiones noctu ad proximum mare dein Romam pergerent.
- Latino
- Bellum Iugurthinum di Gaio Sallustio Crispo
- Sallustio