Erat Italia tunc plena Graecarum artium ac disciplinarum studiaque haec et in Latio vehementius tum colebantur quam nunc eisdem in oppidis et hic Romae propter tranquillitatem rei publicae non neglegebantur. Itaque hunc et Tarentini et Regini et Neopolitani civitate ceterisque praemiis donarunt; et omnes qui aliquid de ingeniis poterant iudicare cognitione atque hospitio dignum existimarunt. Hac tanta celebritate famae cum esset iam absentibus notus Romam venit Mario consule et Catulo. Nactus est primum consules eos quorum alter res ad scribendum maximas alter cum res gestas tum etiam studium atque auris adhibere posset. Statim Luculli cum praetextatus etiam tum Archias esset eum domum suam receperunt. Sic etiam hoc non solum ingeni ac litterarum verum etiam naturae atque virtutis ut domus quae huius adulescentiae prima fuit eadem esset familiarissima senectuti.
- Latino
- Pro Archia Poeta
- Cicerone
