Caesar castris potitus a militibus contendit ne in praeda occupati reliqui negotii gerendi facultatem dimitterent. Pompeiani in quodam monte constiterunt. Hunc montem flumen subluebat. Caesar milites cohortatus, etsi totius diei continenti labore erant confecti noxque iam suberat, tamen munitione flumen a monte seclusit, ne noctu aquari Pompeiani possent. Quo perfecto opere, Pompeiani de deditione agere coeperunt. Pauci ordinis senatorii, qui se cum eis coniunxerant, nocte fuga salutem petiverunt. Caesar prima luce omnes eos, qui in monte consederant, ex superioribus locis in planitiem descendere atque arma proicere iussit. Sine recusatione hoc fecerunt passisque palmis proiecti ad terram flentes ab eo salutem petiverunt; Caesar eos consurgere iussit et pauca de lenitate sua locutus, quo minore timore adfecti essent, omnes conservavit militibusque suis commendavit ne qui eorum violaretur, neu quid sui desiderarent.
- Latino
- Maiorum Lingua C
- Versioni dai Libri di Esercizi
