Iam Romani potentes esse coeperunt. Bellum enim in centesimo et tricesimo fere miliario ab Urbe apud Samnites gerebatur, qui medii sunt inter Picenum, Campaniam et Apuliam atque Romanos oderant. L. Papirius Cursor, cum honore dictatoris ad id bellum profectus esset, magna cum severitate agere coepit. Qui, cum Romam rediret, Q. Fabio Maximo, magistro equitum, quem apud exercitum reliquerat, praecepit ne se absente pugnaret. Ille dictatoris severitatem noverat, tamen, occasione reperta, dimicare voluit et Samnites delevit. Ob quam rem a dictatore capitis damnatus, quod se vetante pugnavisset, ingenti favore militum et populi liberatus est. Tanta enim contra Papirium seditio commota est, ut paene ipse interficeretur.
- Latino
- Lingua Viva 2
- Versioni dai Libri di Esercizi
