Caesar, nondum hieme confecta, proximis quattuor coactis legionibus, de improviso in fines Nerviorum contendit et, priusquam illi aut convenire aut profugere possent, magno pecoris atque hominum numero capto atque ea praeda militibus concessa vastatisque agris, in deditionem venire atque obsides sibi dare coegit. Celeriter confecto negotio, rursus in hiberna legiones reduxit. Concilio Galliae primo vere, ut instituerat, indicto, quia reliqui praeter Senones, Carnutes, Treverosque venerant, initium belli ac defectionis hoc esse arbitratus, concilium Lutetiam Parisiorum transfert. Confines erant Parisii Senonibus civitatemque patrum memoria coniunxerant, sed eos ab hoc consilio afuisse Caesar existimabat. Hac re pro suggestu pronuntiata, eodem die cum legionibus in Senones proficiscitur magnisque itineribus eo pervenit.Cognito eius adventu Acco, qui princeps eius consili fuerat, iubet in oppida multitudinem convenire.
- Latino
- Lingua Magistra 2
- Versioni dai Libri di Esercizi
