Itaque Caesar T. Labienum legatum in Treveros, qui proximi flumini Rheno sunt, cum equitatu mittit. Illi mandat ut ad Remos reliquosque Belgas perveniat atque in officio contineat Germanosque, qui per vim navibus flumen transire conentur, prohibeat. P. Crassum cum cohortibus legionariis duodecim et magno numero equitatus in Aquitaniam mittit, ne ex his nationibus auxilia in Galliam mittantur ac tantae nationes ob odium contra Romanos coniungantur. Q. Titurium Sabinum legatum cum legionibus tribus in Venellos Lexoviosque mittit, ut earum manum distineat. D. Brutum adulescentem classi Gallicisque navibus, quas ex Pictonibus et Santonis reliquisque regionibus revocaverat, praeficit et in Venetos ipse pedestribus copiis contendit.
- Latino
- Lingua Viva 1
- Versioni dai Libri di Esercizi
