Primam certaminum facem Ti. Gracchus accendit, vir insignis genere, forma, eloquentia. Ille, quia putabat plebem iniuste depulsam esse ex agris suis, ingentem rem ausus ast: cum dies rogationis adfuisset, rostra conscendit popularesque leges tulit. Sed ubi Gracchus vidit C. Octavium intercedentem legibus suis, contra consuetudinem legum, imperium collegae obstanti pro bono publico abrogavit atque, iniecta manu, eum depulit rostris. Sic triumvir dividendis agris coloniisque deducendis creatus est; sed sequenti anno cum utile ei visum esset prorogari imperium ad perpetrandas leges agrarias, nobilitas obfuit. Traditur caedes a foro orta esse. Inde in Capitolium Tiberius profugit plebemque ad defensionem salutis suae hortatus est, manu caput tangens; qua re creditum est Tiberium regnum et diadema sibi poscere; itaque duce Scipione Nasica, concitato ad arma populo, Tiberius occisus est: corpus eius traditur in flumen proiectum esse.
- Latino
- Versioni di Marco Porcio Catone
- Versioni dai Libri di Esercizi
