Aduatuci ad Caesarem legatos de pace miserunt. Is respondit se magis consuetudine sua quam merito eorum civitatem conservaturum (esse) si, armis traditis, se dedissent. Legati, re nuntiata ad suos, quae imperarentur se facturos (esse) dixerunt. Armorum magna multitudine de muro iacta in fossam, quae erat ante oppidum, et tamen circiter parte tertia, ut postea perspectum est, celata atque in oppido retenta, portis patefactis, eo die pace usi sunt. Sub vesperum Caesar portas claudi militesque ex oppido exire iussit, ne quam noctu oppidani a militibus iniuriam acciperent. Sed Aduatuci, partim cum his quae retinuerant et celaverant armis, partim scutis ex cortîce factis aut viminibus intextis, quae subito, ut temporis exiguitas postulabat, pellibus induxerant, cum omnibus copiis repente ex oppido eruptionem fecerunt. Celeriter, ut Caesar imperarat (= imperaverat), ignibus significatione facta, ex proximis castellis eo nostri concurrerunt pugnatumque est acerrime. Occisis hominum milibus quattuor, reliqui in oppidum reiecti sunt. Postridie eius diei, refractis portibus atque intromissis militibus nostris, sectionem eius oppidi universam Caesar vendidit.
- Latino
- Maiorum Lingua C
- Versioni dai Libri di Esercizi
