Cum post Actiacam pugnam Augustus Romae amplissimum ageret triumphum, ei occurrit quidam corvum manu tenens, quem docuerat hanc salutationem, adulationis plenam, dicere: «Ave Caesar, victor imperator». Miratus Caesar Octavianus, cuius plurimi intererat animos civium sibi conciliare, officiosam avem viginti milibus nummum emit. Cum paulo in via processisset, eodem modo a psittaco salutatus est, quem tantidem emi iussit. Tantae liberalitatis exemplum sutorem pauperem sollicitavit ut corvum institueret ad eandem salutationem. Sed cum avis non responderet, labore et impendio exhaustus, saepe dominus dicere solebat: «Opera et impensa periit». Aliquando tamen corvus coepit dicere dictatam salutationem et Augustum in via exspectavit sutor, plenus bonae spei. Sed, cum audivisset corvi verba, imperator, talis salutationis incuriosus, respondit: «Satis domi salutatorum talium habeo». Tunc corvus, recordatus verba quibus dominus queri solebat, clara voce addidit: «Opera et impensa periit». Tantum salis admiratus, Caesar risit emique avem iussit tanti quanti nullam aliam adhuc emerat.
- Latino
- Lingua Viva 2
- Versioni dai Libri di Esercizi
