C. Heii domus est vel optima Messanae, notissima certe et nostris hominibus apertissima maximeque hospitalis. Ea domus ante istius adventum ornata sic fuit, ut urbi quoque esset ornamento; nam ipsa Messana, quae situ, moenibus portuque ornata sit, ab his rebus, quibus iste delectatur, sane vacua atque nuda est. Erat apud Heium sacrarium magna cum dignitate a maioribus traditum, perantiquum, in quo (erant) signa pulcherrima quattuor summo artificio, summa nobilitate, quae non modo istum hominem ingeniosum et intelligentem, verum etiam quemvis nostrum delectare possent. Ut ad illud sacrarium redeam, unum signum erat Cupidinis e marmore; ex altera parte Hercules egregie factus ex aere. Is dicebatur esse Myronis. Item ante hos deos erant arulae, quae cuivis reli gionem sacrarii significare poterant; erant aenea duo praeterea signa, non maxima, verum eximia venustate, virginali habitu atque vestitu, quae manibus sublatis sacra quaedam, more Atheniensium virginum, reposita in capitibus sustinebant: Canephoroe ipsae vocabantur; earum artificem Polyclitum esse dicebant. Messanam ut quisque nostrum venerat, haec visere solebat. Haec omnia signa, iudices, ab Heii sacrario Verres abstulit.
- Latino
- Maiorum Lingua C
- Versioni dai Libri di Esercizi
